Drejtuesit e Shkumbinit ankohet tek Avokati i Popullit. Inspektori i këtij organizmi ishte dje në FSHF

Klubi i Shkumbinit dhe drejtuesit më të lartë të skuadrës peqinase janë ankuar dje zyrtarisht tek Avokati i Popullit për dënimin e ashpër që i ka dhënë dy ditë më parë komisioni i disiplinës. Sipas tyre, vendimi i komisionit të disiplinës në FSHF është një padrejtësi e madhe që i është bërë qytetit, qytetarëve dhe skuadrës së Peqinit. Sipas informacioneve zyrtare të marra si në federatë, por edhe pranë Avokatit të Popullit, klubi "Shkumbini" së bashku me bashkinë e këtij qyteti kanë përpiluar një ankesë për dënimin e fushës së Peqinit 3 javë nga FSHF ja. Këtë ankesë ata ia kanë dërguar Avokatit të Popullit dhe, sipas tyre, ai duhet ta zgjidhë këtë çështje. Ankesa e peqinasve, sipas informacioneve, ka qenë e formuluar nga ana sociale. Sipas klubit "Shkumbini", federata dhe komisioni i disiplinës ka gabur, sepse realisht ka dënuar një qytet të tërë me këtë vendim, duke prekur anën sociale të një populli të tërë. Pra, federata me këtë dënim, sipas peqinasve, ka dëmtuar të gjithë qyetin, jo vetëm një klub futbolli. Menjëherë pas ankesës së klubit "Shkumbini", Avokati i Popullit ka lëvizur për të verifikuar në vend problemin dhe ankesën e peqinasve. Menjëherë ky institucion ka dërguar në federatë inspektorin e saj për sportet, Iljaz Çeçon. Ky i fundit ka zhvilluar dje një takim të gjatë me sekretarin e përgjithshëm të federatës, Arben Bici. Në takim, inspektori i Avokatit të Popullit u ka kërkuar informacion të detajuar drejtuesve të federatës për këtë ngjarje. Në fillim, Çeço ka parë dokumentacionin e ndeshjes në fjalë dhe më pas pamjet filmike që ka në administrim federata. Në bashkëbisedimin me sekretarin e përgjithshëm të FSHF së, palët kanë diskutuar gjatë për këtë çështje. Bici e ka informuar inspektorin e Avokatit të Popullit mbi gjithçka, madje dhe mbi komisionin e apelit, i cili do të mblidhet sot paradite për këtë çështje. Ndërkohë, dje, menjëherë pas inspektimit të inspektorit të Avokatit të Popullit, është marrë vesh se në bazë të informacioneve të shkruara nga vëzhguesi, delegati i ndeshjes, dënimi ka qenë shumë i rëndë. Nga ana tjetër, vetëm kaseta filmike është një provë e fortë, ku është bazuar komisioni i disiplinës që ka dënuar ekipin e Peqinit. Gjithsesi, në konkluzionet paraprake që ka bërë inspektori i Avokatit të Popullit mësohet se dënimi i skuadrës peqinase ka qenë i rëndë, pasi ndoshta mund të mos ishin ndëshkuar tifozët, që përbëjnë një problem social. Mund të kishte dënime edhe më të lehta. Gjithsesi, inspektori i Avokatit të Popullit, Çeço, pasi ka marrë me vete të gjithë informacionin, ka vendosur të presë në fillim vendimet e komisionit të apelit, që pritet të mblidhet sot paradite. Më pas, ekzaktësisht ditën e hënë, pasi të shqyrtohet e gjithë dosja dhe faktet që i janë vënë në dispoziocion, ky organizëm do të japë një konkluzion përfundimtar për këtë problem, që duket se është kthyer në çështje dite për futbollin shqiptar.

Apeli mblidhet sot për Peqinin
Komisioni i apelit nuk është mbledhur si zakonisht ditën e premte. Sipas informacioneve në federatë, ky komision ka vendosur që të mblidhet sot në federatë. Në rendin e ditës, apeli ka për të shqyrtuar vendimin më të fundit të disiplinës, i cili ka boshatisur për 3 javë stadiumin e Peqinit për sjellje të rënda ndaj medias.

Kategoria superiore
Skënderbeu Teuta
A.Taullaraj, E.Biçaku, G.Qirici
Besa Elbasani
S.Çekaj, E.Doda, G.Maloku
Shkumbini Partizani
L.Guzja, R.Zhuli, D.Salaj
Tirana Vllaznia
E.Peza, D.Rexha, S.Avdo

Kategoria e parë
Flamurtari Tepelena
S.Velçani, S.Zeka, M. Dervishi
Ada Besëlidhja
L.Jemini I.Ziraj, P.Gaxho
Luftëtari Laçi
M.Sopjani, L.Mustafaraj, A.Muço
Pogradeci Butrinti
R.Shoshaj, B.Bejko, A.Guçe
Tomori Turbina
S.Bogdani, F.Lame, A.Bejtja
Nesër
Apolonia Egnatia
P.Lapi, A.Kuluri, A.Molla

Olsi  Avdiaj