Duket se Blunt ka mbetur ende një djalosh, tepër simpatik dhe i adhuruar nga publiku shqiptar. Koncerti i mbajtur në Tiranë bëri që atë ta prisnin mijëra adhurues në stadiumin "Qemal Stafa".

Para koncertit Blunt mbajti një konferencë për media në sallat e konferencave të hotel "Sheraton".

"Ky koncert është në vazhdën e turit tim botëror dhe Shqipëria si pjesë e botës normalisht është dhe pjesë e këtij turi. Për mua ishte interesante të vija në vendin tuaj, pasi në Angli kam shumë miq shqiptarë. Dhe ky turne është një lloj ‘justifikimi’ për të shkelur në vende të reja që nuk kam qenë ndonjëherë", tha Blunt.

Blunt ka folur edhe për Kosovën ku ai ka rrëfyer vitet e tij gjatë kohës kur ka qenë ushtar britanik në Kosovë.

Gjatë shërbimit në Kosovë, Blunt kishte shkruar këngën, "No bravery". Ai tregonte se dy vjet më parë kishte qenë në Prishtinë për të kënduar për ushtarët britanikë, por dhe për serbët dhe shqiptarët e Kosovës.

I pyetur se përse nuk shkon në Kosovë në këto momente kur është i kërkuar në të gjithë botën, Blunt u shpreh se, "për momentin Kosova po kalon një ndryshim shumë të madh politik, gjë të cilën unë nuk dua ta ngatërroj me muzikën që bëj, pasi ajo është një muzikë që nuk njeh ndryshime në gjini, në raca apo fe. Shpresoj të kthehem në Kosovë në momentin kur situata politike të jetë më e qetë".

Por këngëtari ka pranuar se Kosova ka pasur një ndikim shumë të madh në jetën e tij si artist. "Kosova ka ndikuar shumë në krijimtarinë time. Kam parë njerëz në momentet e tyre më të mira apo në momentet më të këqija. Jam marrë me jetën dhe vdekjen përditë dhe Kosova ka qenë një shkollë për vete për mua. Në albumin tim të parë kam një këngë që i referohet direkt Kosovës. Në albumin tim të dytë kam dy këngë të tjera që kanë lindur nga kjo periudhë", tha Blunt.

Madje Blunt ka paralajmëruar se një pjesë e të ardhurave nga koncerti i djeshëm do të shkojnë për bamirësi në Kosovës. Blunt tregoi se ndihmonte organizatën joqeveritare "Mjekët pa kufi", e cila mbledh fonde jo vetëm për Kosovën, por të gjitha vendet që kanë nevojë për ndihmë kudo në botë.

Blunt është padyshim një këngëtar romantik. Hitet e tij të famshme si "You‘re beautiful" apo "Goodbye my lover" janë rrëfimet më të bukura për dashurinë. Por a ka Blunt një model për femrën që do ta donte pranë tij dhe çmendon ai për të bukurën?

"Në fakt është një këngë që i këndon të bukurës. Por unë nuk është se e kam menduar se cila do të ishte femra ime ideale. Këngët e mia në përgjithësi nuk janë për bukurinë e jashtme. Janë për përpjekjen që njeriu bën për të krijuar një lidhje me të tjerët nëpërmjet mendjes. Kanë të bëjnë me izolimin që ndiejmë të gjithë në jetën tonë të përditshme dhe për pengesat dhe lidhjet që përpiqemi të krijojmë gjatë këtij rrugëtimi që është jeta jonë", tha ai.

Blunt, përndryshe ka bërë edhe një film dokumentar për jetën e tij ushtarake në Kosovë, përderisa e kishte shfaqur atë në New York, me 17 shkurt, kur Kosova e kishte shpallur pavarësinë e saj.

Koncerti i Blunt në Tiranë pati mbështetjen e "Top Channel" dhe "Top Albania Radio". Blunt erdhi në Shqipëri pas një turi mbarëbotëror që ka ndërmarrë për të prezantuar albumin e tij të fundit "All The Lost Souls", i cili u hodh më treg më 17 shtator të vitit 2007. Pjesa më e madhe e këngëve janë shkruar prej tij në shtëpinë që ka në Ibiza. Vetëm gjatë dy javëve të para, albumi është shitur në 650 mijë kopje.