Në qytetin e Vlorës u çel mbrëmjen e së martës Festivali Folklorik Mesdhetar "Vlora 2008". Me këtë rast, në Sheshin e Flamurit u zhvillua një ceremoni, ku ishin të pranishme të gjitha grupet pjesëmarrëse. Nënkryetari i Bashkisë së Vlorës, Halim Dervishaj, që përshëndeti të pranishmit, nënvizoi se festivali është një aktivitet që synon të bashkojë kulturat e popujve dhe të përcjellë mesazhet e miqësisë mes tyre.
"Përmes festivalit, ne afrohemi më shumë mes njeri- tjetrit, njohim më shumë vlerat tona të ndërsjellta, duke veçuar ato elementë që mund të na shërbejnë në këtë drejtim", nënvizoi Dervishaj. Drejtori i Qendrës Kulturore të Vlorës, Istref Dobi, u shpreh se Festivali Foklorik Mesdhetar tashmë është shndërruar në një traditë që po pasurohet gjithnjë e më tepër. Grupet pjesëmarrëse dhanë në natën e parë të këtij aktiviteti një koncert të përbashkët, i cili u ndoq nga qytetarët vlonjatë të pranishëm në Sheshin e Flamurit. Festivali Folklorik Mesdhetar "Vlora 2008" është vazhdim i atyre aktivitetve artistike, që janë zhvilluar në vitet paraardhëse në këtë qytet. Ky aktivitet është shndërruar tashmë në një traditë dhe është konceptuar si pjesë e veprimtarive të organizuara në kuadrin e sezonit turistik veror. Organizatorët synojnë që përmes Festivalit të promovojnë resurset turistike dhe kulturore të Vlorës, ashtu sikundër të përçojnë idenë se Vlora është një qytet mesdhetar, sa edhe ballkanik.
Festivali Folklorik Mesdhetar "Vlora 2008" do të zhvillohet përgjatë 5 ditëve dhe është menduar të konkretizohet në tre pika të ndryshme, të qytetit, duke përfshirë, Sheshin e Flamurit, atë të Pallatit të Sportit dhe në Plazhin e Ri.
Pjesë e aktiviteteve do të jenë edhe dy parada të kostumeve për grupet pjesëmarrëse, një fotomontazh me festivalet paraardhëse, një market i improvizuar ku grupet pjesëmarrëse mund të tregtojnë prodhime të traditës etj. Në ndryshim nga vitet e tjera, Festivali Folklorik Mesdhetar "Vlora 2008" do të shtrihet edhe në Tiranë, Fier e Orikum. Në të marrin pjesë grupe folklorike nga Shqipëria, Kosova, Mali i Zi, Turqia, Maqedonia, Egjipti.