Një veprimtari mbresëlënëse u zhvillua prej datës 24 deri më 30 maj në Athinë: Festivali i Filmit Shqiptar nën devizën "Duke shijuar kinemanë e fqinjit", në praninë e një publiku të zgjedhur grek dhe shqiptar. Bujar Alimani, regjisor i apasionuar që jeton në e punon në tokën greke, autor i tri filmave me metrazh të shkurtër dhe fitues i disa çmimeve prestigjioze, është nismëtar i këtij aktiviteti të përbashkët midis Qendrës Ndërkombëtare të Kinematografisë në Tiranë dhe Qendrës Kinematografike Greke, mbështetur edhe nga ambasada jonë në Athinë. Në ditën e parë të çeljes, përpara shfaqjes së filmit të Anagnostit, "Gjoleka, biri i Abazit" që u ndoq me shumë interes, përshëndeti ambasadori ynë Minarolli, që e konsideroi këtë aktivitet një vlerë të rëndësishme që i afron edhe më tepër të dy popujt tanë fqinjë me histori e heronj të përbashkët, por edhe me krijimtari të ndërsjellë, sikundër është edhe prodhimi kinematografik. Të 25 filmat e shfaqur, ndër të cilët 11 me metrazh të gjatë, 4 me metrazh të shkurtër dhe dy filma dokumentarë, rrëfyen nivelin evropian të kinematografisë shqiptare, ku regjisorë dhe aktorë të shquar paraqitën një krijimtari dinjitoze. Artistë të filmit helen, që i ndoqën këto vepra të subtitruar në gjuhën greke, u shprehën me superlativa për shijet e përparuara estetike të kinemasë shqiptare, e cila është e do të mbetet një "urë bashkëpunimi" jo vetëm midis krijuesve të të dy vendeve, por edhe të gjithë shtetasve tanë.
 

25 - filma shqiptarë u shfaqën në Ditët e Filmit shqiptar në Athinë

11- filma nga ata që u shfaqën ishin me metrazh të gjatë

4 - prej filmave ishin me metrazh të shkurtër

2 - ishin filmat dokumentarë që u shfaqën