ATHINE- Pas portretit të qetë e tërheqës, lëvizjeve energjike dhe një nguti për të përfituar çdo mundësi që i jep bota e artit që ka zgjedhur, Danilo Zeka shpërfaq gjithë dhuntitë e një balerini, i cili gjendet në kulmin e karrierës dhe synon vetëm ngjitjen.
Tashmë, 11 vitet e përpjekjeve për të prekur realizimin e ëndrrave të tij, duken si një prekje e vetme e finishit. Balerini shqiptar që e nisi rrugën e karrierës në Tiranë në Teatrin e Operas dhe Baletit, ka gjithçka që kishte ëndërruar për profesionin e tij. Prej katër muajsh është shpallur balerini i parë i trupës së famshme të Teatrit të Operas dhe Baletit në Athinë. Emri i tij lakohet vetëm për kryerole dhe sukseseve të Danilos i kushtohen faqe të tëra në shtypin grek e më gjerë.
Hasim fotot e tij, mbresëlënëse, të një Oresti që duket sikur flet përmes lëvizjeve të Danilos dhe mësojmë se ky nuk është gjë tjetër veçse një prej arritjeve të tij, të cilën kritika e ka vlerësuar shumë lart. Dy rolet më të fundit të balerinit Danilo Zeka në trupën e Teatrit të Operas dhe Baletit të Athinës, janë pikërisht Oresti në tragjedinë "Elektra" dhe Alberti tek "Zhizel". Gjatë muajit prill, Orestit të Danilo Zekës iu kushtuan kopertina revistash e faqe gazetash prestigjioze në Greqi dhe shfaqjeve të "Elektrës" iu adresuan shumë vlerësime të kritikëve dhe spektatorëve që e ndoqën. Ndërsa muajin e kaluar, "Zhizel" dhe historia e dashurisë ku Danilo portretizoi të dashuruarin Albert, ushqeu shijet e mijëra artdashësve që prej vitesh ndjekin variante të ndryshme të kësaj pjesë të famshme baleti.
Por me gjithë suksesin e padiskutueshëm në vendin fqinj, Danilo Zeka, i cili rrugëton thuajse rregullisht dy herë në vit nga Athina për në Tiranë, këtu, në vendin e lindjes njihet fare pak.
Tashmë është 30 vjeç. Historia e jetës dhe karrierës së tij i ngjan në vija të trasha historisë së çdo artisti shqiptar që janë larguar nga Shqipëria për të kërkuar suksesin në skenat ndërkombëtare. Danilo është larguar nga Tiranë për në Greqi në vitin 1997. Një moment kritik, ku ëndrrat dhe shpresat e të gjithë shqiptarëve ishin në pikëpyetje. Danilo është ndoshta ndër të paktët balerinë të karrierës, i cili baletin megjithëse e kishte shumë pasion, filloi ta mësojë në mënyrë sistematike jo në moshën 5-vjeçare, ashtu si gjithë fëmijët e tjerë, por në shkollën e mesme. Pasi përfundoi Shkollën e Baletit, ai u emërua në Teatrin e Operas dhe Baletit në Tiranë ku interpretoi për pak kohë. Pas një ftese të papritur në vitin 1997, për në Zvicër, për një specializim bashkë me dy kolegë të tjerë, ku Danilo qëndroi dy muaj, ai u rikthye në Tiranë, pikërisht në momentin e trazirave të '97-ës. Në një intervistë të para pak muajve në gazetën "Albania Press", që botohet në Greqi, Danilo thotë se për fat të mirë "kishim një mësues që kishte ardhur në Greqi më herët, bashkë me familjen e tij. Ai na bëri një ftesë mua dhe shokut tim për të ardhur këtu. Na dhanë vizë tremujore, e cila për ne ishte rasti që prisnim". Edhe pse më vonë ai pati oferta për të shkuar në Angli, në trupën e baletit të Teatrit Mbretëror në Londër, si dhe në Amsterdam, nuk ka pranuar. Duket ka bërë një zgjedhje që i shkon për shtat karakterit të tij, një rrugë ku bashkohen pasionet. "Jam një karakter që dua të jetoj edhe jetën. Në Europë kërkesat profesionale janë të mëdha dhe jeta atje është më monotone se këtu, për faktin e thjeshtë se punon shumë dhe nuk të mbetet aspak kohë për veten. Nga kjo anë, në Greqi ndihem shumë i kënaqur, pasi arrij të argëtohem, të takohem me njerëzit dhe miqtë e mi", - thotë Danilo, balerini shqiptar që kapërceu të gjithë vështirësitë e një artisti emigrant dhe ka interpretuar në vepra si "Karmen", apo "Zorba", me kompozitorin grek Miki Theodhoraqis, apo në "Liqeni i mjellmave", me koreografin e njohur rus, Ilea Zaleski. Ka marrë pjesë në shfaqjet klasike më të rëndësishme të kryeqytetit helen, apo në Evropë si dhe në aktivitete apo festivale ndërkombëtare.
Të gjithë shqiptarët që jetojnë në Greqi nuk e harrojnë balerinin shqiptar, i cili në shtator të vitit 2004, në Pazarin e Vjetër të Athinës ndezi pishtarin e lojërave para-olimpike. Po ashtu, e kujtojnë mirë portretin e Danilos, kur para pak kohësh u bë pjesë e një fushate publicitare kombëtare në Greqi. Danilo Zeka ishte në qendër të reklamave në metronë e Athinës, në vendet publike e në çdo hapësirë tjetër të përdorur për fushatën. Si një gërshetim mes pasionit të tij për baletin klasik dhe dëfrimeve e atmosferës që fal jeta e famshme e buzuqeve greke, balerini shqiptar nuk ka lënë asnjë rast që i është ofruar për të kërcyer në të gjitha buzuqet e me të gjithë këngëtarët e njohur grekë. Por a do ta shohim ndonjë ditë në skenën shqiptare të Teatrit të Operas dhe Baletit në Tiranë, Danilo Zekën, pikërisht aty ku e nisi rrugëtimin artistik? Balerini energjik me lëvizje të zhdërvjellëta thotë se nuk do të mendohej fare nëse e i bëhet një propozim i tillë. "Më kanë munguar shumë duartrokitjet e vendit tim dhe besoj kjo nuk më ndodh vetëm mua, por të gjithë kërcimtarëve tanë që jetojnë jashtë Shqipërisë".

(s.g/GazetaShqiptare/Balkanweb)
 




____________
\"Mos shikoni kishat as xhamijat se feja e shqiptarit eshte shqiptaria.\"